డైలీ భారత్, ​చిలకలూరిపేట: ఆస్తి వ్యామోహం మనుషుల మధ్య బంధాలను తుంచేస్తోంది.కన్నవారు అనే మమకారం లేకుండా,ఆస్తి వాటా కోసం ఓ కుమార్తె ఏకంగా తను పుట్టి పెరిగిన ఇంటికే నిప్పు పెట్టిన ఘటన పల్నాడు జిల్లా చిలకలూరిపేటలో కలకలం రేపింది.

​అసలేం జరిగిందంటే?

​చిలకలూరిపేట పట్టణంలోని గుర్రాల చావిడి ప్రాంతంలో మంగళవారం రాత్రి ఈ దారుణం చోటు చేసుకుంది.స్థానికంగా నివాసం ఉంటున్న దంపతులకు,వారి వివాహిత కుమార్తెకు మధ్య కొంతకాలంగా ఆస్తి విషయమై వివాదాలు నడుస్తున్నాయి.ఆస్తిలో తన వాటా ఇవ్వాలంటూ సదరు కుమార్తె నిత్యం తల్లిదండ్రులను వేధింపులకు గురిచేసేదని సమాచారం.మంగళవారం రాత్రి ఈ వివాదం కాస్తా ముదరడంతో, ఆమె విచక్షణ కోల్పోయింది. తల్లిదండ్రులు తన మాట వినడం లేదన్న కోపంతో, వారితో కలిసి ఉంటున్న ఇంటిపై పెట్రోల్ పోసి నిప్పు పెట్టింది.​భయాందోళనలో కుటుంబ సభ్యులు

​క్షణాల్లో మంటలు వ్యాపించడంతో ఇంట్లోని వారు తీవ్ర భయాందోళనకు గురయ్యారు.ప్రాణాలు అరచేతిలో పెట్టుకుని కుటుంబ సభ్యులందరూ తృటిలో బయటకు పరుగులు తీశారు. అయితే,మంటల తీవ్రతకు ఇంట్లోని ఫర్నిచర్ మరియు ఇతర విలువైన సామాగ్రి పూర్తిగా అగ్నికి ఆహుతయ్యాయి.

​పోలీసుల రంగప్రవేశం..

​సమాచారం అందుకున్న వెంటనే పోలీసులు సంఘటనా స్థలానికి చేరుకుని పరిస్థితిని సమీక్షించారు.బాధితుల ఫిర్యాదు మేరకు నిందితురాలైన కుమార్తెపై కేసు నమోదు చేసినట్లు పోలీసులు తెలిపారు. ప్రస్తుతం ఈ ఘటనపై దర్యాప్తు కొనసాగుతోంది.

​కన్నవారిని కనికరించకుండా,ఆస్తి కోసం ప్రాణాలను సైతం లెక్కచేయకుండా ఇలాంటి ఘాతుకానికి ఒడిగట్టడం స్థానికంగా చర్చనీయాంశమైంది.