డైలీ భారత్, కామారెడ్డి : ఈరోజు కురిసిన భారీ వర్షాల కారణంగా బీబీపేట్ పోలీస్ స్టేషన్ పరిధిలోని సీతారాంపల్లి గ్రామ సమీపంలో ఒక భారీ చెట్టు రోడ్డుపై పడిపోవడంతో వాహనాల రాకపోకలకు అంతరాయం ఏర్పడింది.

సమాచారం అందుకున్న వెంటనే బీబీపేట్ ఎస్ఐ గారు, పోలీసు సిబ్బంది సంఘటనా స్థలానికి చేరుకుని పరిస్థితిని పరిశీలించారు. అనంతరం గ్రామస్థుల సహకారంతో రోడ్డుపై పడిన చెట్టును తొలగించి రహదారిని పూర్తిగా క్లియర్ చేశారు. దీంతో వాహనాల రాకపోకలు తిరిగి సజావుగా పునరుద్ధరించబడ్డాయి.

భారీ వర్షాల నేపథ్యంలో ప్రజల భద్రతకు ఎలాంటి ఇబ్బందులు తలెత్తకుండా పోలీసులు అప్రమత్తంగా వ్యవహరించి అవసరమైన చర్యలు చేపట్టారు. అత్యవసర పరిస్థితుల్లో వెంటనే స్పందించి ప్రజలకు సేవలందించడం పోలీసు శాఖ బాధ్యతగా భావిస్తూ విధులు నిర్వర్తిస్తున్నట్లు అధికారులు తెలిపారు.

ఈ సందర్భంగా జిల్లా ఎస్పీ ఎం. రాజేష్ చంద్ర, IPS వేంటనే స్పందించి రహదారిని క్లియర్ చేసిన బీబీపేట్ పోలీసు సిబ్బందిని అభినందించారు. అలాగే పోలీసులకు సహకరించి చెట్టు తొలగింపు కార్యక్రమంలో పాల్గొన్న సీతారాంపల్లి గ్రామస్థులను ప్రత్యేకంగా అభినందిస్తూ, ఇలాంటి సందర్భాల్లో ప్రజలు పోలీసులకు సహకరించడం అభినందనీయమని పేర్కొన్నారు.