కామారెడ్డి, డైలీ భారత్: జిల్లాలో సంచలనం సృష్టించిన ఆన్‌లైన్ బెట్టింగ్/గేమింగ్ మోసం కేసులో పోలీసులు మరో కీలక నిందితుడిని అదుపులోకి తీసుకున్నారు.

31-07-2026న రామారెడ్డి పోలీస్ స్టేషన్‌లో ఈ కేసు నమోదైంది. ఇప్పటికే ఇద్దరిని అరెస్ట్ చేసి రిమాండ్‌కు పంపగా, పరారీలో ఉన్న వారిని పట్టుకునేందుకు జిల్లా ఎస్పీ యం. రాజేష్ చంద్ర, ఐపీఎస్ ప్రత్యేక బృందాలను ఏర్పాటు చేశారు.

కామారెడ్డి డీఎస్పీ పర్యవేక్షణలో బృందాలు సాంకేతిక, డిజిటల్ ఆధారాలతో పాటు నిఘా సమాచారాన్ని ఆధారంగా చేసుకుని అనకాపల్లి జిల్లా చీడికాడ మండలం వెల్లంకి గ్రామానికి చెందిన ముత్యాల నాయుడు @ రొంగలి ముత్యాలు నాయుడు, వయసు 36, ను అరెస్ట్ చేశారు.

మోసం చేసిన తీరు:

నిందితుడు SAT Sports మరియు http://Future9(dot)com అనే వెబ్‌సైట్ల ద్వారా బెట్టింగ్ నిర్వహిస్తున్నాడు. వాట్సాప్‌లో లింకులు పంపి పెట్టుబడి పెడితే రెట్టింపు లాభాలు ఇస్తామని ప్రజలను నమ్మించాడు. బాధితుల పేర్లతో యూజర్ ఐడీలు క్రియేట్ చేసి, UPI, బ్యాంకు ఖాతాలు, QR కోడ్‌ల ద్వారా డబ్బు వసూలు చేశాడు.

పోలీసులు నిందితుడి నుంచి ఒక Apple iPhone ను స్వాధీనం చేసుకున్నారు. ఆ ఫోన్‌లో బెట్టింగ్ వెబ్‌సైట్లకు సంబంధించిన ముఖ్యమైన డిజిటల్ ఆధారాలు ఉన్నట్లు గుర్తించారు.

ఈ ముఠాలో ఇంకా ఉన్న వారి గురించి, బ్యాంకు లావాదేవీలు, డిజిటల్ పరికరాలపై దర్యాప్తు కొనసాగుతోందని ఎస్పీ తెలిపారు. త్వరలో మిగిలిన నిందితులను కూడా అరెస్ట్ చేస్తామన్నారు.