గుంటనక్క చేతిలో కేసీఆర్…ఉద్యమ రథం దారితప్పింది 

ఇక మనమే అసలైన ప్రతిపక్షం 

కవిత సంచలన గర్జనతో తెలంగాణ రాజకీయాల్లో కొత్త దిశ 

డైలీ భారత్, హైదరాబాద్ డెస్క్: తెలంగాణ రాజకీయాల్లో భారీ కలకలం రేపే పరిణామంగా మాజీ ఎమ్మెల్సీ కల్వకుంట్ల కవిత కొత్త రాజకీయ వేదికను ప్రకటిస్తూ “తెలంగాణ రాష్ట్ర సేన”గా నామకరణం చేశారు. ఆవిర్భావ సభలో ఆమె చేసిన వ్యాఖ్యలు రాష్ట్రవ్యాప్తంగా సంచలనంగా మారాయి. ముఖ్యంగా “గుంటనక్క చేతిలో కేసీఆర్… ఆయన మన మనిషి కాదు, మరమనిషి” అంటూ చేసిన ఘాటు వ్యాఖ్యలు రాజకీయ వర్గాల్లో తీవ్ర చర్చకు దారితీశాయి.

సభలో కవిత తన రాజకీయ దిశను స్పష్టంగా తెలియజేస్తూ, “ఇప్పుడు మనమే ప్రధాన ప్రతిపక్షం” అని ప్రకటించారు. మార్పు కోసం పోరాటం తప్పనిసరి అయిందని, ముఖ్యంగా ఎస్సీ, ఎస్టీ, బీసీ, మైనారిటీ వర్గాలకు న్యాయం జరగాలంటే కొత్త రాజకీయ శక్తి అవసరమని పేర్కొన్నారు. ఇప్పటి వరకు అధికారాలు, హామీలు ఉన్నప్పటికీ సామాజిక న్యాయం పూర్తి స్థాయిలో అందలేదని విమర్శించారు.

పార్టీ ఆవిర్భావం అనంతరం అభిమానుల మధ్యకు వచ్చిన కవితకు భారీ స్వాగతం లభించింది. ఈ సందర్భంగా అభిమానులు అందించిన గాజుల గంపను ఆమె తలపై పెట్టుకోవడం ప్రత్యేక ఆకర్షణగా నిలిచింది. ఈ దృశ్యం మహిళా శక్తికి ప్రతీకగా నిలిచిందని, సంప్రదాయం, భావోద్వేగం కలిసిన క్షణంగా మారిందని అక్కడి నాయకులు పేర్కొన్నారు.

ఇక రాబోయే ఎన్నికలపై కూడా కవిత కీలక ప్రకటన చేశారు. వచ్చే GHMC, MPTC, ZPTC ఎన్నికల్లో తమ పార్టీ తప్పకుండా పోటీ చేస్తుందని స్పష్టం చేశారు. స్థానిక సంస్థల ఎన్నికల ద్వారా ప్రజల్లోకి వెళ్లి తమ బలం నిరూపించుకుంటామని తెలిపారు. గ్రామస్థాయి నుంచి నగర స్థాయి వరకు తమ పార్టీ విస్తరించబోతుందని వెల్లడించారు.

ఈ సందర్భంగా కవిత మాట్లాడుతూ, తెలంగాణలో ప్రత్యామ్నాయ రాజకీయ శక్తిగా ఎదగడమే లక్ష్యమని, ప్రజల ఆశయాలు, ముఖ్యంగా బలహీన వర్గాల హక్కులు సాధించడమే తమ ప్రధాన అజెండా అని చెప్పారు. మహిళలకు గౌరవం, యువతకు అవకాశాలు, రైతులకు భరోసా, కార్మికులకు న్యాయం అందించే విధంగా తమ పార్టీ పని చేస్తుందని తెలిపారు.

కవిత చేసిన ఈ ప్రకటనలతో తెలంగాణ రాజకీయాల్లో కొత్త సమీకరణాలు ఏర్పడే సూచనలు కనిపిస్తున్నాయి. ఒకవైపు అధికార పార్టీ, మరోవైపు సంప్రదాయ ప్రతిపక్షాల మధ్య కొత్త రాజకీయ శక్తిగా తెలంగాణ రాష్ట్ర సేన ఎంతవరకు ప్రభావం చూపుతుందన్నది ఇప్పుడు ఆసక్తికరంగా మారింది.

రాజకీయ విశ్లేషకుల అభిప్రాయం ప్రకారం, కవిత కొత్త పార్టీతో ముందుకు రావడం రాష్ట్ర రాజకీయాల్లో కీలక మలుపుగా మారే అవకాశం ఉంది. రాబోయే రోజుల్లో ఈ పార్టీ చర్యలు, ప్రజల స్పందన ఎలా ఉంటుందన్నదే ఇప్పుడు అందరి దృష్టిని ఆకర్షిస్తోంది.