డైలీ భారత్, దమ్మన్నపేట: జాతీయ ఉత్తమ ఉపాధ్యాయ అవార్డు గ్రహీత, దమ్మన్నపేట ZPHS భౌతిక శాస్త్ర ఉపాధ్యాయుడు టి. సంపత్ కుమార్కు తెలంగాణ రాజ్‌భవన్ నుంచి అరుదైన గౌరవం లభించింది. భారత 80వ స్వాతంత్ర్య దినోత్సవం సందర్భంగా హైదరాబాద్‌లోని రాజ్‌భవన్‌లో గవర్నర్ శివ ప్రతాప్ శుక్లా, జానకి శుక్లా నిర్వహిస్తున్న ప్రత్యేక కార్యక్రమానికి సంపత్ కుమార్‌ను ఆహ్వానించారు.

గవర్నర్ దంపతుల ఆహ్వానంతో ఆగస్టు 15న సాయంత్రం రాజ్‌భవన్ లాన్స్‌లో నిర్వహించే స్వాతంత్ర్య దినోత్సవ కార్యక్రమంలో పాల్గొనే అవకాశం ఆయనకు దక్కింది. గ్రామీణ ప్రభుత్వ పాఠశాలలో పనిచేస్తూ విద్యార్థుల్లో శాస్త్రీయ ఆలోచన, సృజనాత్మకత, ఆవిష్కరణలను ప్రోత్సహిస్తూ జాతీయ, అంతర్జాతీయ స్థాయిలో విద్యార్థులకు గుర్తింపు తీసుకురావడంలో సంపత్ కుమార్ చేస్తున్న కృషికి ఈ ఆహ్వానం ప్రత్యేక గౌరవంగా భావిస్తున్నారు.

జాతీయ ఉత్తమ ఉపాధ్యాయుడిగా రాష్ట్రపతి నుంచి అవార్డు అందుకున్న సంపత్ కుమార్‌కు రాజ్‌భవన్ నుంచి నేరుగా ఆహ్వానం అందడం పట్ల దమ్మన్నపేట ZPHS ప్రధానోపాధ్యాయులు, ఉపాధ్యాయులు, గ్రామ సర్పంచ్, వార్డు సభ్యులు, విద్యార్థుల తల్లిదండ్రులు హర్షం వ్యక్తం చేశారు. గ్రామీణ ప్రాంతంలో విద్యా రంగానికి, ముఖ్యంగా విద్యార్థుల ఆవిష్కరణలకు ఆయన చేస్తున్న సేవలకు ఇది సముచితమైన గుర్తింపని వారు అభినందించారు.

“ఒక ప్రభుత్వ పాఠశాల ఉపాధ్యాయుడిగా రాజ్‌భవన్‌లో గవర్నర్ నిర్వహించే స్వాతంత్ర్య వేడుకలకు ఆహ్వానం అందుకోవడం ఎంతో గర్వంగా ఉంది. ఈ గౌరవం నా ఒక్కరిదే కాదు—నా విద్యార్థులు, సహచర ఉపాధ్యాయులు, పాఠశాల, తల్లిదండ్రులు మరియు దమ్మన్నపేట గ్రామ ప్రజలందరిదీ” అని సంపత్ కుమార్ పేర్కొన్నారు.