డైలీ భారత్, కొత్తగూడెం: డాక్టర్‌ జి.ఎస్.ఆర్. చారిటబుల్‌ ట్రస్ట్‌ ఆధ్వర్యంలో కొత్తగూడెం నియోజకవర్గంలోని మూడు ప్రాంతాల్లో ఫ్రీజర్‌ బాక్సులను పంపిణీ చేశారు. ట్రస్ట్‌ వ్యవస్థాపకులు, జనసేన పార్టీ రాష్ట్ర నాయకులు డాక్టర్‌ గడల శ్రీనివాసరావు ఆధ్వర్యంలో శనివారం ఈ కార్యక్రమం జరిగింది.

సుజాతనగర్‌ మండలం సింగభూపాలెం, పాల్వంచ మండలం కోడిపుంజులవాగు గ్రామపంచాయతీలతోపాటు కొత్తగూడెం మున్సిపాలిటీ పరిధిలోని సెయింట్‌ ఫ్రాన్సిస్‌ ఆర్‌సీఎం చర్చికి ఒక్కొక్క ఫ్రీజర్‌ బాక్సును అందజేశారు. ఆయా ప్రాంతాల ప్రజలు అవసరమైనప్పుడు వీటిని ఉచితంగా వినియోగించుకోవచ్చని నిర్వాహకులు తెలిపారు.

ఈ సందర్భంగా డాక్టర్‌ గడల శ్రీనివాసరావు మాట్లాడుతూ.. పుట్టిన ప్రాంతానికి సేవ చేయాలనే లక్ష్యంతో జి.ఎస్.ఆర్. చారిటబుల్‌ ట్రస్ట్‌ను ఏర్పాటు చేసినట్లు తెలిపారు. గత ఆరేళ్లుగా మహిళలు, నిరుద్యోగ యువతకు ఉపాధి, నైపుణ్య శిక్షణతోపాటు వైద్య సేవలు అందిస్తున్నామన్నారు. దూర ప్రాంతాల్లో ఉన్న బంధువులు వచ్చే వరకు మృతదేహాలను భద్రపరిచేందుకు ఇబ్బందులు లేకుండా ఫ్రీజర్‌ బాక్సులను అందిస్తున్నట్లు చెప్పారు. కులమతాలకు అతీతంగా మానవత్వంతో సేవ చేయడమే ట్రస్ట్‌ లక్ష్యమన్నారు.

కొత్తగూడెం నియోజకవర్గంలోని పేదలకు విద్య, వైద్య రంగాల్లో సహకారం అందిస్తామని తెలిపారు. త్వరలో నియోజకవర్గంలో మొబైల్‌ వైద్య సేవలను ప్రారంభించి, ఏజెన్సీ ప్రాంతాల్లోని ఆదివాసీలు, నిరుపేద కుటుంబాలకు వైద్య సేవలు అందిస్తామని పేర్కొన్నారు.

కార్యక్రమంలో జనసేన పార్టీ రాష్ట్ర నాయకులు రాము యాదవ్‌, ఖమ్మం జిల్లా ఇన్‌చార్జి మిర్యాల రామకృష్ణ, సత్తుపల్లి నియోజకవర్గ ఇన్‌చార్జి నరేష్‌, కొత్తగూడెం నాయకుడు శ్యామ్‌ జోగారావు, ట్రస్ట్‌ మేనేజర్‌ అంజి, సింగభూపాలెం సర్పంచి కిన్నెర వెంకన్న, కోడిపుంజుల వాగు సర్పంచి మహేశ్వరి, మహేష్ ఆర్.సి.యం ఫాదర్ బాలస్వామి కమిటీ సభ్యులు పాల్గొన్నారు.