డైలీ భారత్, వరంగల్:నర్సంపేట ఘటన విషాదాంతం… ఆర్టీసీ డ్రైవర్ శంకర్ గౌడ్ మృతి, రాష్ట్రవ్యాప్తంగా ఆవేదన 

వరంగల్ జిల్లా నర్సంపేటలో ఆత్మహత్యాయత్నానికి పాల్పడిన ఆర్టీసీ డ్రైవర్ శంకర్ గౌడ్ చికిత్స పొందుతూ మృతి చెందడం తీవ్ర విషాదాన్ని మిగిల్చింది. కార్మికుల సమస్యల నేపథ్యంలో జరిగిన ఈ ఘటన ఇప్పుడు రాష్ట్రవ్యాప్తంగా చర్చనీయాంశంగా మారింది.

శంకర్ గౌడ్ సుమారు 80 శాతం కాలిన గాయాలతో తీవ్ర స్థితిలో ఉండగా, వైద్యులు అత్యవసర చికిత్స అందించారు. పరిస్థితి అత్యంత విషమంగా మారడంతో గ్రీన్ ఛానెల్ ద్వారా వరంగల్ ఎంజీఎం ఆసుపత్రి నుంచి హైదరాబాద్‌కు తరలించే ప్రయత్నం చేశారు. అయితే నగరానికి చేరుకున్న అనంతరం ఆయన ప్రాణాలు కోల్పోయినట్లు అధికార వర్గాలు వెల్లడించాయి.

ఈ విషాద ఘటనతో ఆర్టీసీ వర్గాల్లో తీవ్ర దిగ్భ్రాంతి, ఆవేదన నెలకొంది. సహచర కార్మికులు కన్నీటి పర్యంతమవుతూ, ఇటువంటి దుర్ఘటన జరగడం చాలా బాధాకరమని తెలిపారు. ఇటీవల వరుసగా జరుగుతున్న ఆత్మహత్యాయత్నాలు కార్మికుల ఆత్మస్థైర్యం ఎంత దెబ్బతిన్నదో చూపిస్తున్నాయని సంఘాలు ఆందోళన వ్యక్తం చేస్తున్నాయి.

కార్మికుల సమస్యలు, వేతనాలు, ఉద్యోగ భద్రత, సేవా నిబంధనలు వంటి అంశాలపై సరైన పరిష్కారం లేకపోవడం వల్లే ఇలాంటి దుర్ఘటనలు జరుగుతున్నాయని కార్మిక సంఘాలు ఆరోపిస్తున్నాయి. ఈ ఘటనపై పూర్తి స్థాయి విచారణ జరిపి బాధ్యులపై చర్యలు తీసుకోవాలని, కుటుంబానికి తక్షణ ఆర్థిక సహాయం అందించాలని వారు డిమాండ్ చేస్తున్నారు.

మరోవైపు ఈ ఘటనపై రాజకీయ వర్గాల్లో కూడా తీవ్ర ప్రతిస్పందనలు వ్యక్తమవుతున్నాయి. కార్మికుల సమస్యలను ముందుగానే పరిష్కరించి ఉంటే ఈ పరిస్థితి వచ్చేదా..? అనే ప్రశ్నలు వినిపిస్తున్నాయి. ప్రభుత్వం తక్షణం స్పందించి స్పష్టమైన నిర్ణయాలు తీసుకోవాలని ప్రతిపక్షాలు డిమాండ్ చేస్తున్నాయి.

మొత్తంగా నర్సంపేట ఘటన ఆర్టీసీ వ్యవస్థలో నెలకొన్న సమస్యలను మరింత బలంగా వెలుగులోకి తెచ్చింది. ఒక కార్మికుడి ప్రాణం పోవడం కేవలం వ్యక్తిగత విషాదమే కాకుండా… వ్యవస్థలో మార్పు అవసరాన్ని గుర్తు చేస్తున్న సంఘటనగా మారింది.

“ఇంకెంతవరకు ఇలాంటి ఘటనలు జరుగాలి..? కార్మికుల సమస్యలకు శాశ్వత పరిష్కారం ఎప్పుడు..?” అనే ప్రశ్నలు ఇప్పుడు రాష్ట్రవ్యాప్తంగా వినిపిస్తున్నాయి.