డిప్యూటీ సూపరెండెంట్ ఆఫ్ పోలీస్ కె. నాగేంద్రచారి

డైలీ భారత్, రాజన్న సిరిసిల్ల: ప్రపంచ మాదక ద్రవ్యాల వినియోగం మరియు అక్రమ రవాణా వ్యతిరేక దినోత్సవం సందర్భంగా హెల్పింగ్ హార్ట్స్ వెల్ఫేర్ సొసైటీ, స్వచ్ఛంద సంస్థ ఆధ్వర్యంలో ఈరోజు సిరిసిల్ల పాత బస్టాండ్ వద్ద “మన ఊరు నుండి డ్రగ్స్‌ను తరిమికొడదాం” అనే నినాదంతో డ్రగ్స్ వ్యతిరేక అవగాహన కోసం సిగ్నేచర్ క్యాంపెయిన్ నిర్వహించారు.

ఈ కార్యక్రమానికి ముఖ్య అతిథిగా హాజరైన డిప్యూటీ సూపరెండెంట్ ఆఫ్ పోలీస్ కె. నాగేంద్రచారి మాట్లాడుతూ, “డ్రగ్స్ ఫ్రీ సిరిసిల్ల” లక్ష్యంగా యువత, తల్లిదండ్రులు, ఉపాధ్యాయులు, ప్రజాసంఘాలు, స్వచ్ఛంద సంస్థలు అందరూ కలిసికట్టుగా ముందుకు రావాలని పిలుపునిచ్చారు.

మాదకద్రవ్యాలు వ్యక్తిగత ఆరోగ్యానికే కాదు, కుటుంబాలకు, సమాజానికి, ముఖ్యంగా యువత భవిష్యత్తుకు తీవ్ర ముప్పుగా మారుతున్నాయని ఆయన అన్నారు. సరదా, ఒత్తిడి, చెడు స్నేహాలు, తప్పుదారి పట్టించే అలవాట్లు యువతను డ్రగ్స్ వైపు నెడుతున్నాయని, అలాంటి పరిస్థితులను ముందుగానే గుర్తించి వారిని సరైన దిశగా నడిపించడం కుటుంబ సభ్యులు, ఉపాధ్యాయులు, సమాజంలోని బాధ్యతగల ప్రతి ఒక్కరి కర్తవ్యమని పేర్కొన్నారు.

డ్రగ్స్ వినియోగం వల్ల మానసిక ఆరోగ్య సమస్యలు, శారీరక దుష్ప్రభావాలు, ఆర్థిక నష్టాలు, నేరప్రవృత్తులు పెరిగే ప్రమాదం ఉందని తెలిపారు. డ్రగ్స్ నిర్మూలన కోసం కేవలం పోలీసుల చర్యలు మాత్రమే కాకుండా ప్రజల సహకారం, నిరంతర అవగాహన, యువతలో సానుకూల జీవన విలువలు పెంపొందించడం చాలా అవసరమని అన్నారు.

ఈ సందర్భంగా నిర్వహించిన సిగ్నేచర్ క్యాంప్ లో యువత, విద్యార్థులు, మహిళలు, స్థానిక ప్రజలు పెద్ద ఎత్తున పాల్గొని డ్రగ్స్‌కు వ్యతిరేకంగా తమ మద్దతు తెలిపారు. 

హెల్పింగ్ హార్ట్స్ వెల్ఫేర్ సొసైటీ ప్రతినిధులు మాట్లాడుతూ, సమాజంలో మాదక ద్రవ్యాలపై మరింత అవగాహన కల్పించేందుకు ఇలాంటి కార్యక్రమాలను కొనసాగిస్తామని తెలిపారు. యువతను వ్యసనాల బారిన పడకుండా కాపాడటం ప్రతి ఒక్కరి సామాజిక బాధ్యత అని పేర్కొన్నారు.

ఈ కార్యక్రమంలో సైకాలజిస్ట్ కె.పున్నంచందర్, మున్సిపల్ కౌన్సిలర్ బుర్ర నారాయణ గౌడ్, హెల్పింగ్ హార్ట్స్ అధ్యక్షుడు అలువాల ఈశ్వర్, అడ్వకేట్ దాసరి తిరుమల, సంస్థ సభ్యులు, సామాజిక కార్యకర్తలు, యువత, విద్యార్థులు, స్థానిక ప్రజలు తదితరులు పాల్గొన్నారు.