వివాదాలకు, కేరాఫ్ అడ్రస్ గా జిల్లా మెడికల్ కళాశాల

గతంలో ఇలాంటి ఘటనలు జరిగిన మారని తీరు

మెడికల్ కళాశాలలో సీనియర్ విద్యార్థుల ర్యాగింగ్ కలకలం? 

డైలీ భారత్ న్యూస్, నిజామాబాద్:నిజామాబాద్​ జిల్లా కేంద్రంలో ప్రభుత్వ మెడికల్​ కళాశాలలో దారుణం చోటుచేసుకుంది. ఎంబీబీఎస్​ నాలుగో సంవత్సరం చదువుతున్న విద్యార్థిపై సీనియర్​లు (పీజీ విద్యార్థులు) ర్యాగింగ్​కు పాల్పడ్డారు. సుమారు పది మంది విద్యార్థుల వరకు కలిసి అమాయకుడిని చితకబాదారు. ఈ ఘటన స్థానికంగా కలకలం రేపుతుంది.బాధితుడి కథనం ప్రకారం..

హైదరాబాద్​ సమీపంలోని పటాన్​చెరుకు చెందిన యువకుడు​ రాహుల్​ నిజామాబాద్​లోని ప్రభుత్వ మెడికల్​ కాలేజీలో ఎంబీబీఎస్​ నాలుగో సంవత్సరం చదువుతున్నాడు. కాగా, ఇంటర్నల్​ డ్యూటీలో భాగంగా బాధిత విద్యార్థి ప్రభుత్వ జనరల్​ హాస్పిటల్​లో విధులు నిర్వర్తించాడు. అయితే రాహుల్​ విధులకు గైర్హాజరైనట్లు సీనియర్​లు(పీజీ విద్యార్థులు) రిజిస్టర్​లో నమోదు చేశారు. బాధిత విద్యార్థి ఈ విషయమై శనివారం  సీనియర్​ల వద్దకు వెళ్లి అడిగాడు. తాను డ్యూటీ చేసినా కూడా.. ఎందుకు గైర్హాజరు వేశారని అడిగాడు. దీంతో మమ్మల్నే నిలదీస్తావా.. అంటూ సీనియర్​లు బాధిత విద్యార్థిపై మూకుమ్మడి దాడికి పాల్పడ్డారు. సుమారు అర గంట పాటు ర్యాగింగ్​ చేపట్టారు. ప్రశ్నలతో విసిగించారు. ఫోన్​ లాగేసుకున్నారు. తనకు ఆరోగ్యం సరిగా లేదు.. జాండిస్​ అయ్యాయి.. తనను వదిలేయమని ప్రాధేయపడినా.. వదిలిపెట్టకుండా కొట్టారని బాధిత విద్యార్థి పేర్కొన్నారు. మెడికల్​ కాలేజీలో జరిగిన ర్యాగింగ్​, మెడికల్​ విద్యార్థిపై దాడి విషయం బయటకు రాకుండా కళాశాల అధికారులు విశ్వప్రయత్నం చేస్తున్నారు. లోలోపలే కాంప్రమైస్​ చేసేందుకు బాధిత విద్యార్థిపై ఒత్తిడి తీసుకొస్తున్నారు. తప్పు చేసిన సీనియర్​ల విషయంలో మెడికో లీగల్​ కేసు (ఎమ్మెల్సీ)  ఇష్యూ చేసేందుకు మీనమేషాలు లెక్కిస్తున్నారు.