డైలీ భారత్ న్యూస్, నిజామాబాద్: కామారెడ్డిలోని సమీకృత కార్యాలయాల భవనంలో ఏసీబీ సోదాలు సంచలనం సృష్టించాయి. కలెక్టరేట్​లోని సివిల్ సప్లయ్​ కార్యాలయంలో  ఏసీబీ డీఎస్పీ శేఖర్ గౌడ్  ఆధ్వర్యంలో అధికారులు తనిఖీలు నిర్వహిస్తున్నారు. ఉదయం 9:30 గంటలకు కలెక్టరేట్​కు చేరుకున్న ఏసీబీ అధికారులు సాధారణ వ్యక్తుల మాదిరిగా కలెక్టరేట్ మొత్తం కలియ తిరిగినట్టుగా తెలుస్తోంది. అనంతరం గంట తర్వాత సివిల్ సప్లయ్స్​​ కార్యాలయంలోకి వెళ్లి సిబ్బంది ఫోన్లు తీసుకుని సోదాలు ప్రారంభించినట్టుగా సమాచారం. కార్యాలయ సిబ్బంది ఎవరు ఏ విధులు నిర్వర్తిస్తారు అనే వివరాలు తీసుకుని కార్యాలయంలోని రికార్డులు తనిఖీలు చేపట్టారు. ఉదయం నుంచి ఇంకా సోదాలు కొనసాగుతూనే ఉన్నాయి. అయితే ఆకస్మికంగా ఏసీబీ సోదాలు జరగడం కలకలం రేపింది. ఈ తనిఖీల్లో భాగంగానే సోదాలు సర్వసాధారణంగా  చేపడుతున్నారా..? లేక ఎవరైనా బాధితులు ఫిర్యాదు చేశారా... అనే విషయం ఉమ్మడి జిల్లాలో చర్చనీయాంశంగా మారింది. సోదాలకు సంబంధించి పూర్తి వివరాలు తెలియాల్సి ఉంది.