డైలీ భారత్ న్యూస్, నిజామాబాద్:నిజామాబాద్​ మెడికల్​ కళాశాల లో జూనియర్​ను ర్యాగింగ్​ చేసిన విద్యార్థులు సస్పెన్షన్​కు గురయ్యారు. ఈ మేరకు కళాశాల ప్రిన్సిపాల్​ కృష్ణమోహన్​ ఉత్తర్వులు జారీ చేశారు. ఐదుగురు ఇంటెన్స్​ను ఆరు నెలలపాటు సస్పెన్షన్ చేయడంతో పాటు హాస్టల్ నుంచి శాశ్వతంగా తొలగిస్తూ నిర్ణయం తీసుకున్నారు. ర్యాగింగ్​ ఘటనపై ప్రిన్సిపల్ అధ్యక్షతన యాంటీ ర్యాగింగ్ కమిటీ సోమవారం ఉదయం సమావేశమైన విషయం తెలిసిందే. ఘటనపై ఇరువర్గాల వాదనలను వినడంతో పాటు జుడా మెంబర్​తో మాట్లాడిన అనంతరం సస్పెండ్​ చేశారు. అంతేకాకుండా తదుపరి చర్యలపై పోలీస్ శాఖ సమర్పించిన నివేదిక మీద చర్యలు తీసుకోనున్నారు. యాంటీ ర్యాగింగ్​ కమిటీ సమావేశంలో అడిషనల్ కలెక్టర్, డీసీపీ, జీజీహెచ్​ సూపరింటెండెంట్​, అడిషనల్ సూపరింటెండ్​, వైస్ ప్రిన్సిపల్, అకడమిక్, డ్మినిస్ట్రేటివ్ వైస్ ప్రిన్సిపాల్, వివిధ శాఖల అధిపతులు హాజరయ్యారు.

పటాన్​చెరుకు చెందిన రాహుల్​ రెడ్డి ప్రస్తుతం మెడికల్​ కాలేజీలో నాలుగో సంవత్సరం చదువుతున్నాడు. ఇంటర్నల్​ డ్యూటీలో భాగంగా ప్రభుత్వ జనరల్​ హాస్పిటల్​లో విధులు నిర్వర్తించాడు. అయితే రాహుల్​ విధులకు గైర్హాజరైనట్లు సీనియర్​ అయిన సాయిరాం పవన్​ రిజిస్టర్​లో నమోదు చేశాడు. దీనిపై ప్రశ్నించడంతో బెదిరింపులకు పాల్పడ్డాడు. అంతేగాకుండా శనివారం సాయంత్రం మాట్లాడుదామని పిలిపించి సీనియర్లు దాడి చేశారు. పలువురు విద్యార్థులు రాహుల్​ను ర్యాగింగ్​ చేయడంతో పాటు బెదిరించారు.

బాధిత విద్యార్థి ఫిర్యాదు మేరకు నగరంలోని వన్​ టౌన్​ పోలీసులు ఆదివారం కేసు నమోదు చేశారు. సాయిరాం పవన్, శ్రావణ్, సాత్విక్ హృదయ పాల్, అభినవ్ పెద్ది, ఆదిత్యతో పాటు పలువురు రాహుల్​పై దాడి చేశారు. ఈ మేరకు పోలీసులు బి ఎన్ ఎస్ 292, 115(2), 131 సెక్షన్లతో పాటు తెలంగాణ ర్యాగింగ్ నిషేధ చట్టం సెక్షన్ 4(1), 4(11) కింద కేసు నమోదు చేసి, దర్యాప్తు చేస్తున్నారు. తాజాగా ర్యాగింగ్​కు పాల్పడిన ఐదుగురు విద్యార్థులను ప్రిన్సిపాల్ సస్పెండ్​ చేశారు.